༄༅། །མང་ཐོས་འདུལ་བ་འཛིན་པ་ལྷོ་པ་དགེ་བཤེས་ཚུལ་ཁྲིམས་རྒྱལ་མཚན་མཆོག་གི་ལོ་རྒྱུས།

མང་ཐོས་འདུལ་བ་འཛིན་པ་ལྷོ་པ་དགེ་བཤེས་ཚུལ་ཁྲིམས་རྒྱལ་མཚན་མཆོག་ནི་ཕྱི་ལོ་ ༡༩༢༤ ལོར་མདོ་ཁམས་ཤར་ཕྱོགས་སུ་ངོ་མཚར་བའི་དགེ་མཚན་དུ་མ་དང་བཅས་སྐུ་བལྟམས། ཡབ་ཡུམ་གཉིས་ཀྱིས་འཇམ་དཔལ་ཡེ་ཤེས་ཅེས་མཚན་བཏགས། སྐུ་ཆུང་ངུའི་དུས་ནས་ཕལ་པའི་སྤྱོད་པ་ལས་འདས་ཤིང་ཞི་དུལ་བག་དང་ལྡན་པ་དང་། ལྷག་པར་དུ་ཁོང་གི་ཨ་ཞང་ཞིག་ཡོད་པ་དེ་དགོན་པར་དཔེ་ཆ་གཟིགས་པ་དང་མཇལ་སྐབས་ཕྱག་དཔེ་གཟིགས་འདོད་ཀྱི་འདུན་པ་དམིགས་གསལ་ཞིག་བྱུང་བ་སོགས་ཀྱི་རྐྱེན་པས་ཡབ་ཡུམ་གཉིས་ཀྱིས་རབ་བྱུང་བསྒྲུབ་དགོས་པར་འདུག་བསམ་ནས་རབ་ཏུ་བྱུང་བ་མ་ཟད་ཕྱོགས་དེར་བཞུགས་པའི་སེ་རའི་དགེ་བཤེས་བྱམས་པ་མཐའ་ཡས་བཤེས་གཉེན་དུ་བསྟེན་སྟེ་རིགས་ལམ་ནས་བཟུང་བཀའ་པོད་ལྔ་སོགས་མདོ་སྔགས་ཀྱི་གཞུང་ལ་ལོ་དགུའི་རིང་སྦྱངས་བརྩོན་མཛད།

དེའི་སྐབས་དབུས་ཀྱི་གདན་ས་ཆེན་པོ་སེ་ར་ཐེག་ཆེན་གླིང་ཞེས་པ་དེར་ཕྱིན་ནས་མདོ་སྔགས་གཉིས་ཀྱི་དོན་ཚང་ལ་མ་ནོར་བ་བུམ་པ་གང་བྱོའི་ཚུལ་དུ་བཞུགས་དགོས་སྙམ་པའི་འདུན་པ་ཤུགས་ཆེར་སླེབས་པའི་རྐྱེན་བྱས་ནས།  འབྱོར་ལྡན་གྱི་ཚོང་པ་འགའ་དང་།  གནས་སྐོར་བ་སོགས་ཀྱི་ལྷན་དུ་དཀའ་སྤྱད་ལ་མ་འཛེམས་པར་རི་ཀླུང་བརྒྱ་ཕྲག་བརྒལ་ཏེ་བརྗིད་ཆགས་རབ་ཏུ་ལྡན་པའི་བོད་ཀྱི་རྒྱལ་ས་ལྷ་སར་གེགས་མེད་དུ་བདེ་བར་འབྱོར།

རིམ་བཞིན་ས་གསུམ་ན་ཉི་ཟླ་ལྟར་གྲགས་པའི་གདན་ས་གསུམ་གྱི་ཡ་གྱལ་རི་བོ་དགེ་ལུགས་པའི་མ་མགོན་རྗེ་བདག་ཉིད་ཆེན་པོའི་གདན་ས་འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་དང་ཉེ་བའི་སར་འབྱོར་སྐབས་དགེ་འདུན་པ་འགའ་ཞིག་གིས་གསོལ་ཇ་འབུལ་མི་བྱུང་དང་། དེ་ནས་དགའ་ལྡན་དགོན་པར་འབྱོར་སྐབས་དེའི་ཉིན་རྗེ་བླ་མའི་དགོངས་རྫོགས་ཀྱི་དུས་ཆེན་སྟེ་དགའ་ལྡན་ལྔ་མཆོད་ཆེན་མོ་དང་སྟབས་འཁེལ་བ་དང་། དགུང་སྔོན་གྱི་གནམ་མཁར་དར་དཀར་ཀྱི་ལམ་འཁྲིགས་པ་དང་། བསླབ་གསུམ་ལྡན་པའི་དགེ་འདུན་པ་ཚོས་ཀུན་བཟང་གི་མཆོད་སྤྲིན་རྒྱ་ཆེར་བཤམས་ཤིང་མར་མེ་སྟོང་ལ་སོགས་པའི་མཆོད་པ་རྒྱ་ཆེར་འབུལ་བ་དང་།

གཞུང་ཆེན་བཀའ་པོད་ལྔའི་རྩ་བ་འདོན་པ་སོགས་དགེ་བའི་བྱ་བ་སྣ་ཚོགས་ཀྱིས་སྒོ་ནས་རྗེ་རིན་པོ་ཆེའི་དགོངས་རྫོགས་དུས་ཆེན་དང་སྟབས་འཁེལ་བས་རྟེན་འབྲེལ་དུ་ཐུགས་དགོངས་ནས་ད་ནི་དགོན་པ་འདི་གར་མདོ་དང་སྔགས་ཀྱི་དོན་རྣམས་ལ་མཐར་ཕྱིན་པར་སློབ་གཉེར་བྱེད་སའི་གནས་སུ་འདུག་དགོངས་ནས། དགའ་ལྡན་རྣམ་པར་རྒྱལ་བའི་གླིག་གི་ཡ་གྱལ་དཔལ་ལྡན་ཤར་རྩེ་གྲྭ་ཚང་དུ་སྒྲིག་བཞུགས་བྱས། དེའི་སྐབས་གྲྭ་ཚང་གི་མཁན་རིན་པོ་ཆེ་མཁན་རབས་བདུན་བཅུ་དོན་གསུམ་པ་༧སྐྱབས་རྗེ་ཟོང་རྡོ་རྗེ་འཆང་མཆོག་གི་མདུན་སར་གསར་མཇལ་དང་མཚན་བཀོད་ཞུས་ནས་སློབ་གཉེར་ཚུལ་བཞིན་གནང་།

དེ་ནས་ཕྱི་ལོ་ ༡༩༥༩ ལོར་བོད་ལྗོངས་ཁྱོན་དང་འདྲ་བར་དགོན་པར་རྒྱ་མིའི་དམག་འཁྲུགས་གིས་རྐྱེན་པས་རབ་བྱུང་སྟོང་ཕྲག་འགའ་དང་མཉམ་དུ་རྒྱ་གར་འཕགས་པའི་ཡུལ་དུ་བྲོས་བྱོལ་ལ་ཕེབས་དགོས་བྱུང་།  ཐོག་མར་(དྷ་ལ་ཧོ་ས་)ཞེས་པའི་ཡུལ་དེར་འབྱོར། དེར་ལོ་ངོ་གཉིས་རིང་སློབ་གཉེར་བྱས་ནས་རྒྱུགས་འབུལ་མཐའ་མ་མཛད། དེ་ནས་དྷ་སར་༧གོང་ས་མཆོག་དང་ཡོངས་འཛིན་རྣམ་གཉིས་ཀྱི་དུང་དུ་དགེ་བཤེས་ལྷ་རམས་པའི་དམ་འཇོག་བྱས་པའི་གོ་སྐབས་ཐོབ་པ་མ་ཟད་དགེ་བཤེས་ལྷ་རམས་རྩེ་ཕུད་ཀྱི་གཟེངས་རྟགས་ཀྱང་ཐོབ།  ༡༩༦༣ ལོར་ Sussex , England,  ནང་Pestalozzi རྒྱལ་སྤྱིའི་སློབ་ཕྲུག་ཚོ་ལ་ཆོས་ཀྱི་སློབ་སྦྱོང་གི་དགེ་རྒན་གནང་།

དེའི་སྐབས་ཁོང་རང་ཉིད་དང་་དང་ལྷན་དུ་བོད་ཀྱི་ད་ཕྲུག་ཡིན་པའི་སློབ་ཕྲུག་༢༢་མཉམ་འཁྲིད་བྱས།  དུས་ཡུན་ལོ་ངོ་བདུན་རིང་ལ་གཙོ་བོ་བོད་རྒྱུད་ནང་པའི་ལྟ་གྲུབ་དང་བོད་ཀྱི་སྐད་ཡིག ཡུལ་སྲོལ་གོམས་གཤིས་བཅས་ལ་སློབ་ཁྲིད་གནང་། ཕྱི་ལོ་ ༡༩༧༦ ལོར་ཨ་རིར་ཕེབས་ཞོར་ཞིག་ལ་ USC, UC , Santa Barbara  ucla བཅས་ལ་སྒོམ་སྒྲུབ་དང་བོད་སྐད་ཡིག་བཅས་ཀྱི་སྐོར་ལ་བཀའ་སློབ་གནང་། དེའི་སྐབས་ཀྱི་སློབ་ཕྲུག་ཚོས་ཁོང་གི་བཀའ་སློབ་ལ་ཡིད་དབང་འཕྲོག་ནས་སློབ་གཉེར་ཁང་ཞིག་གསར་འཛུགས་གནང་དགོས་པའི་འབོད་བསྐུལ་ནན་གྱིས་ཞུས་པདང་།

མཐར་ཁོང་གིས་ཕྱི་ལོ་ ༡༩༧༩ ལོར་ los Angels དུ་སློབ་གཉེར་ཁང་ཞིག་གསར་དུ་དབུ་འཛུགས་བྱས་པ་དང་། སློབ་གཉེར་ཁང་འདིའི་མིང་ཡང་༧གོང་ས་མཆོག་ལ་སྐྱབས་འཇུག་ཞུས་པས་༧གོང་ས་མཆོག་ནས་ཐུབ་བསྟན་དར་རྒྱས་གླིང་ཞེས་པའི་ད་ལྟའི་མིང་འདི་བཀའ་དྲིན་བསྩལ།  གཞན་ཡང་ Colorado དང་ taxas བཅས་ས་ཆ་ཁག་གཉིས་ལ་སློབ་གཉེར་ཁང་བཙུགས་ཡོད་པ་མ་ཟད་དེ་དག་གི་ནང་ maxico  Alaska Omala  དང་།  England བཅས་རྒྱལ་ཁབ་ཁག་མང་པོ་ནས་ཕེབས་པའི་སློབ་ཕྲུག་ཧ་ཅང་མང་པོ་ཡོད།

ཐོག་མར་སློབ་གཉེར་ཁང་བཙུགས་དགོས་པའི་དམིགས་ཡུལ་ནི། དགེ་ཕྲུག་མང་པོ་ཞིག་གིས་རེ་བ་ལྟར་ནངས་པ་སངས་རྒྱས་པའི་ཆོས་འདིས་ཐོག་ནས་འགྲོ་བ་རྣམས་ལ་བདེ་སྐྱིད་བསྐྲུན་ཆེད་དང་།འགྲོ་བ་མིའི་ཐོབ་ཐང་།ལྷག་པར་དུ་བོད་མིར་རང་སྲིད་རང་སྐྱོང་ཡོང་བའི་ཆེད་དམིགས་པ་ཞིག་ཀྱང་ཡིན།  ཁོང་གིས་རླབས་ཆེན་གྱི་མཛད་པ་མཐའ་ཡས་པ་ཞིག་གི་ནང་ནས་ཕྱོགས་ཙམ་ཞིག་བཀོད་ན།བཙན་བྱོལ་དུ་ཡོད་པའི་བོད་ཀྱི་སློབ་གྲྭ་ཁག་དང་། གདན་ས་ཁག་གི་གཙོས་པའི་དགོན་སྡེ། རྒན་གསོ། ཉམས་ཐག་གི་རིགས། དེ་བཞིན་རྒྱ་གར་གྱི་ཉམས་ཐག་་ལོང་བའི་སློབ་གྲྭ་ཁག་ལ་མང་དངུལ་འབོར་ཆེན་བཏང་བས་༧གོང་ས་མཆོག་ནས་མི་དམངས་ཁྲི་ཁྲག་བརྒལ་བའི་དབུས་སུ་བསྔགས་བརྗོད་ཡང་ཡང་གནང་ཡོད།

དགེ་བཤེས་རང་ཉིད་ཀྱིས་བརྩམས་པའི་བརྩམ་ཆོས་ཀྱང་། ༼བློ་མིག་འབྱེད་བྱེད་ཀྱི་སྡེ་མིག་དང་།  བློ་སྦྱོང་ཚིག་བརྒྱད་མ་དང་ལག་ལེན་སོ་བདུན་མའི་རྣམ་བཤད་མཛད། ཤེས་རབ་གསལ་བའི་མེ་ལོང་དང་སྟོང་ཉིད་ཀྱི་སྐོར་སོགས་ཕྱག་དེབ་མང་དུ་བརྩམས་གནང་མཛད་ཡོད། དེ་ནས་འདུལ་བྱ་རྣམས་བསོད་ནམས་དམན་པའམ་ཡང་ན་རྟག་འཛིན་ཅན་རྣམས་ཆོས་ལ་སྐུལ་ཕྱིར་ཕྱི་ལོ་༢༠༠༩སྤྱི་ཟླ་༢པའི་ཚེས་ ༡༣རེས་གཟའ་པ་སངས་ཉིན་ཨ་རི་ཐུབ་བསྟན་དར་རྒྱས་གླིང་གི་ཆོས་ཚོགས་ཀྱི་གཟིམ་ཤག་ཏུ་ཡ་མཚན་གྱི་ལྟས་དང་བཅས་སྐུ་མྱ་ངན་ལས་འདའ་ཚུལ་བསྟན་པ་དང་། སྐུ་གདུང་ཡང་རྒྱ་གར་འཕགས་པའི་ཡུལ་གྱི་ལྷོ་ཕྱོགས་དགའ་ལྡན་རྣམ་པར་རྒྱལ་བའི་གླིང་དུ་གདན་དྲངས་ནས་ཞུགས་འབུལ་བྱས།